काठमाडौं । विगत केही दिनदेखि देशका विभिन्न भागमा आगलागी र डढेलाेकाे प्रकाेप देखिएकाे छ । काभ्रेपलाञ्चाेक जिल्लाकाे विभिन्न भागमा डढेलाे लागेकाे छ । नमाेबुद्ध नगारपालिका, तेमाल गाउँपालिका, पाँचखाल नगरपालिकालगायत विभिन्न भागमा आगलागी भएकाे छ ।
त्यस्तै, खाेटाङ, भाेजपुर,माेरङलगायतका जिल्लाका विभिन्न भागमा पनि आगलागी र डढेलेकाे प्रकाेप देखिएकाे छ ।
प्रधानमन्त्री पुष्पकमल दाहालले नेपालको पूर्वी क्षेत्रमा भएको आगलागीबाट ठूलो धनजनको क्षति भएकामा दुःख व्यक्त गर्नुभएको छ । उहाँले आगलागीका कारण मोरङ, भोजपुरलगायत जिल्लामा शनिबार धनजनको क्षति भएकामा आफू मर्माहत भएको बताउँदै घटनालगत्तै गए राति नै सामाजिक सञ्जाल फेसबुकमार्फत सन्देश प्रवाह गर्दै सचेतना अपनाउन आम नागरिकमा अनुरोध गर्नुभएको छ ।
“भोजपुरलगायत पूर्वी नेपालका पहाडी जिल्लाहरूमा आगलागीबाट धनजनको क्षति भएको घटनाले मर्माहत तुल्याएको छ । घटनाप्रति गहिरो दुःख व्यक्त गर्दै आगलागीबाट हुनसक्ने सम्भावित जोखिमप्रति पूर्वसचेतता अपनाउन सम्पूर्ण जनसमुदायमा अनुरोध गर्दछु”, उहाँले भन्नुभएको छ । भोजपुरको हतुवागडी गाउँपालिका–७ मा शनिबार आगलागीमा परी एकै परिवारका तीन बालबालिकाको मृत्यु भएको छ ।
पछिल्लो दुई दिनमा उदयपुर, काठमाडौँ, महोत्तरी, सुर्खेत, तेह्रथुम, सप्तरी, ताप्लेजुङलगायत जिल्लामा आगलागी र डढेलोका घटना भएका छन् । केही ठाउँमा मानव बस्ती नै विस्थापित भएको छ ।
