-ईश्वरी थापा
काठमाडौ । नेपाल ट्रेड यूनियन महासंघ (जिफन्ट)ले श्रम कानुनको कार्यान्वयनमा देखिएका समस्याहरुलाई संशोधन गर्दै अगाडि बढ्नु पर्ने र श्रम क्षेत्रका सबै किसिमका श्रमिकहरुका लागि एउटै प्रकृतिको श्रम कानुन हुनु पर्ने बताएको छ ।
नेपालका प्रमुख यूनियनहरुको पनि यही धारणा भएको हुनाले जिफन्टलगायत सबै यूनियन मिलेर श्रम कानुनको संशोधन प्रक्रियामा योजनाबद्ध रुपमा अगाडि बढ्नुपर्ने जिफन्टको मान्यता रहेको अध्यक्ष बिनोद श्रेष्ठले बताउनुभएको हो ।
जिफन्ट ट्रेड यूनियन स्कूलमा श्रम कानुन सुधारका लागि ‘ग्याप यनालाइसिस् अध्ययन प्रतिवेदन’ मा भएको छलफलमा अध्यक्ष श्रेष्ठले उक्त कुरा बताउनुभएको हो ।
आइटियूसी एसिया प्रशान्त क्षेत्रका मानव तथा ट्रेड यूनियन अधिकार प्रमुख मोनिना वाङले आइएलओ अभिसंन्धि—९८ र सोसँग सम्बन्धित अभिसन्धिबारे बताउँदै नेपालको श्र्रम कानुनलाई श्रममैत्री र प्रभावकारी बनाउन आइटियूसी नेपालको ट्रेड यूनियनहरुसँग सहकार्य गर्ने बताउनुभयो ।
श्रम ऐन, २०७४ मा भएको प्रावधान र विश्लेषण, ट्रेड यूनियन ऐन, २०४९ को कार्यान्वयनको चुनौती सम्बन्धमा गरेको अध्ययन प्रतिवेदन, नेपालले ११ वटा कन्भेन्सन मात्र पारित गरेको सम्बन्धमा, श्रम कानुन सम्बन्धमा जिफन्टलगायत अन्य ट्रेड यूनियनहरुप्रति रोजगारदाता लगायतका प्राथमिकताहरु, श्रम कानुन सम्बन्धमा नेपालको अन्तर्राष्ट्रिय दायित्व सम्बन्धी अधिवक्ता भक्तिराम घिमिरेले प्रस्तुत गर्नु भएको प्रतिवेदनमाथि प्रदेश र घटक यूनियनका सहभागीहरुले सुझाब राख्नु भएको थियो ।
आबद्ध यूनियनका नेतृत्व आन्टुफ उपाध्यक्ष धनबहादुर विक र सार्टुकका प्रतिनिधि सहभागी रहनुभएको कार्यक्रमको सञ्चालन सहजिकरण जिफन्ट महासचिव लक्ष्मण शर्माले गर्नु भएको थियो ।
